Version "Schwiizerdüütsch"  
 

40 Johr isch es här, dass de nüünjährigi Nils Gessinger in Schwäbisch Hall en Saal vo 400 Gescht mit sine Klavierkünscht zum Schtuune broocht hätt. Hüttzutags füllt die 12chöpfigi Nils Gessinger Band d'Halle und Zält vo grosse internazionale Jazz-Festivals, und bliibt nöd nur i de Chöpf vo de Hörer hange, sondern hätt au mit "Angel" i de indonesische Radio-Charts Erfolg chönne verbueche. Sone Karriere bruucht echli Glück, aber ganz zuefällig isch si nöd: Bi sim Grossvatter hätt de Nils zum erschte Mol klassische Underricht gha, im Jazz-Club vo sine Eltere hätt er d'Liebi zu de "Blue Notes" entdeckt, und de schwarzi Funk & Soul hätt er i de Disco vo sim Brüeder glehrt schetze.

Schtudiert hätt er dänn "Jazz & Klassik" bim Dieter Glawischnig a de Musighochschuel Hamburg. I dere Ziit hätt sich de aagfrässni Töff-Fahrer au i de Hamburger Musigszene chönne etabliere.

D'Dee Dee Bridgewater, d'Inga Rumpf, The Platters oder de Georg Danzer schätzed sini Virtuosität und sis musikalische Fiingfühl, d'NDR-Big-Band hätt ihn für zahlriichi Studio- und Liveproduktione angaschiert. I de Zwüscheziit isch er Leiter vom Hamburger Jazz-Landes-Jugendorcheschter "Jazzessence", und hätt mit ihne scho 4 CDs (under anderem mit em Bob Mintzer) produziert.

Im 1995 isch sini erscht CD "Ducks'n'Cookies" entschtande, wo nöd nur bi Fachlüüt uf Uufmerksamkeit gschtosse isch. Insgesamt 28 Musiker, drunder au d'Inga Rumpf, d'Bridget Fogle, de Billy King, de Peter Weniger und de Herb Geller als Gescht, händ zum unerreichte Sound vo de 14 in Dolby-Surround abgmischte Funk-, Soul-, Latino- und Fusion-Schtuck us em Nils sinere Fädere biitreit.

Über de Vertrag, wo mit em bekannte US-Label GRP abgschlosse worde isch, isch d'Gschicht vom Tommi LiPuma im Umlauf. De legendäri Produzänt vom Miles Davis, em Al Jarreau, de Randy Crawford oder em David Sanborn hätt bimene Düütschland-Bsuech es Tape vom Nils Gessinger i d'Händ übercho und ihn sofort und als erschte europäische Musiker verpflichtet.

Dank em internazionale Erfolg vo dem Album isch de Nils zu grosse Jazz-Festivals iiglade worde. So hätt er bim Hamburger Westport-Festival 95 d'Schtimmig für de George Benson uufgheizt, und Spyro Gyra händ im Novämber 95 d'Bühni mit ihm teilt.

Scho im 1996 hätt de Pianischt, Komponischt und Arrangschöör gnueg nüüs Material zäme gha, zum d'Uufnahme für sini zweit CD "Scratch Blue" z'mache. 41 Musiker, drunder d'Gitarrelegände Robben Ford und de Posunischt Nils Landgren, händ e Mischig us Vokal- und Inschtrumentaltitel iigschpilt. Mit dene Schtuck hätt d'Band bim North Sea Jazz Festival 96 in Den Haag d'Zuhörer in Bann gschlage.

Im 1997 hätt d'ARD em Nils e schtündigi "Ohne Filter extra" Uusgab gwidmet, mit em Robben Ford als Special Guest.

Im 2001 hätt de Nils 16 nüi Titel für sis dritte Album "Jam it up!" gschribe, woner im Momänt z'Los Angeles und z'Wakendorf II produziert, under anderem mit em Gastschtar Dave Weckl.

 
   

english

deutsch

français

espanol

uff hohelouisch

 
  top